Komunikado: ADC ta selebrá yegada di e punto mas haltu di su edifisio nobo na Otrobanda

OTROBANDA – ADC N.V. djárason último a selebrá ku a yega e punto di mas haltu di e edifisio nobo ku ta den konstrukshon.

Na fin di novèmber 2022 a hasi ‘groundbreaking’ di e laboratorio nobo i den yanüari 2023 e trabounan di konstrukshon a start den full swing i awor ya a alkansá e punto máksimo den altura. Den forma di e evento ‘Spantenbier’ a selebrá e logro memorabel aki.

Direktora sra. Liane Cova huntu ku Raad van Bestuur di ADC, Minister C. Cooper, Minister J. Silvania, trahadónan di e kompania di konstrukshon, i empleadonan di ADC a subi na e punto máksimo ariba di e edifisio.

Tabata un momento spesial kaminda direktora di ADC sra. Liane Cova a dirigí palabra na tur stakeholders, trahadónan di ADC i trahadónan den konstrukshon pa gradisí nan pa nan tremendo esfuerso i empeño, ku konhuntamente a logra yega e ‘top’ di konstrukshon.

Minister di Tráfiko, Transporte i Planifikashon Urbano, sr. Charles Cooper a indiká ku e ta kontentu ku konstrukshon di edfisio nobo i ta mira esaki komo “injekshon finansiero den nos ekonomia ku ta duna kupo di trabou i ta brinda speransa pa un ADC muchu mas moderno, efisiente i alabes serka di nos hospital.”

Tambe Minister di Salubridat, Medio Ambiente & Naturalesa, sr. Javier Silvania a rekonosé e balor inmenso ku ADC ta agregá na salubridat di Kòrsou. “E edifisio nobo aki no lo solamente duna un mihó ambiente di trabou pa e empleadonan di ADC, pero tambe lo hunga un ròl krusial den promové investigashon sientífiko, inovashon i kuido di salú na nos isla.”

Huntu ku empleadonan di ADC a hasi un bríndis i deseá tur esnan enbolbí ku e proyekto di konstrukshon, éksito pa asina por finalisá e proyekto aki ku ta di gran balor pa Otrobanda.

ADC Otrobanda lo ta un laboratorio  ‘state of the art’; kaminda ta sigui brinda tur tipo di spesialismo den un konsepto moderno. Esaki lo bira e edifisio prinsipal di ADC ku tur disiplina huntu bou di un dak. Ta trata di un edifisio di tres piso ku lo akapará tur aktividat di ADC riba un tereno di 5.500 meter kuadrá.

Tur departamento lo muda eventualmente pa e edifisio nobo aki; tambe esnan ku aktualmente ta na edifisio di Vredenberg, ku ta trahá for di 1960.

Nos laboratorio nashonal ta kumpli ku e normanan di mas haltu i estrikto den análisis médiko. ADC ta e úniko laboratorio na nos pais ku tin un gran skala di spesialismo. P’esei awor ta bin un laboratorio aun mas sofistiká, pa sigui brinda pueblo di Kòrsou i region, e mihó servisio i kalidat di análisis & diagnóstiko médiko i di awa. E ta krea base sólido pa un futuro pa enfrentá retonan di salú i kontribuí na bienestar di nos komunidat.

Alabes ku yegada di ADC su edfisio nobo den Otrobanda, ta krea oportunidatnan nobo.

Un edifisio lokalisá den kurason di salubridat serka di Ministerio di GMN i banda di nos hospital. E lokalidat stratégiko aki lo fortalesé e kolaborashon i komunikashon entre diferente servisionan di salú. Esaki ta duna impulso pa sigui desaroyá e área di Otrobanda i Colon den un sentro di servisio di salubridat pa nos pueblo i region.

ADC, E Laboratorio Nashonal ku ta Destaká.

INFORMASHON ADISHONAL

E edifisio ta diseñá pa e arkitekto di Kòrsou, Lyongo Architects di OZ Architects.

Kontratistanan lokal lo ehekutá e proyekto ku Q-Con Quality Constructors komo kontratista prinsipal huntu ku Installation Technologies, SimpleAire i Industech.

E proyekto ta finansiá pa Vidanova Pension Fund.