Akreditashon prolongá pa ADC su laboratorio di awa

WILLEMSTAD – Laboratorio nashonal ADC ta partisipá ku orguyo ku su laboratorio di awa a pasa un ouditoria rigoroso di Raad voor Accreditatie (RvA) ku gran éksito. Esaki ta nifiká ku awor ADC su laboratorio di awa ta akreditá pa e norma di ISO 17025:2017 – e normanan di mas resien pa kòntròl di kalidat di awa pa bebe i di awa pa hasi diálisis kuné.

E logro akí ta pas den ADC su afan pa ofresé e servisio di mas moderno na e nivel di ekspertisio di mas haltu ku mundu konosé.

Mantené i oumentá
Meskos ku tabata e kaso ku e vershon anterior di e akreditashon akí – e ISO 17025:2005 – ADC lo sigui esforsá su mes pa mantené e akreditashon akí sin interupshon, te ora ku tin un vershon nobo, pa kua ADC lo apliká mesora.

Simultaneamente Kòrsou su laboratorio nashonal lo sigui oumentá e kantidat di análisis akreditá ku e ta ofresé, pa di forma progresivo sigui garantisá ku e posibilidatnan pa tèst di awa ta mas ámplio posibel i di e kalidat di mas haltu alkansabel.

Rekonosementu mundial
RvA ta un instituto hulandes ku ta kontrolá si instituto- i empresanan ta kumpli ku e rekisitonan vigente pa un akreditashon di tipo ISO deseá. RvA mes ta miembro di e European co-operation for Accreditation (EA). Esaki ta duna e akreditashonnan ku RvA otorgá, rekonosementu mundial.

Pabien na e personal di ADC ku e logro aki, na bienestar di Kòrsou.