ADC ta tèst bo awa!

WILLEMSTAD— Awe riba Dia Internashonal di Awa, Analytisch Diagnostisch Centrum (ADC) ta start ku su kampaña di awa. Ku e kampaña aki ADC kier konsientisá pueblo di Kòrsou riba  e importansia pa tèst awa regularmente. Pa medio di diferente tep i informashon balioso ADC lo hasi uso di diferente medio di komunikashon pa informá i eduká pueblo di Kòrsou tokante di esaki.

Nos laboratorio nashonal no ta solamente un laboratorio médiko, pero tambe e tin su laboratorio di awa. Manera konosí e laboratorio aki tambe ta karga su akreditashon ISO 17025. Riba petishon di Gobièrnu di Kòrsou, organisashonnan komersial i klientenan partikular ADC ta hasi análisis i kontrol diario. Di e forma aki ADC ta pèrkurá ku nos por hasi uso di nos awa ku un kurason trankil, ku garantia ku e ta di kalidat haltu.

Durante di e kampaña di konsientisashon ku ADC lo bai hiba, lo enfatisá riba entre otro riba tèst awa di pos i tambe awa di pisina pa asina nos por bira mas konsiente di nos uso i kon esensial ta pa tèst bo awa regular. Den e laboratorionan, ekspertonan por investigá presis si tin algun organismo ku ta kousa malesa den bo awa òf si tin kímiko ku tin riesgo pa bo salú. Pa mas informashon tokante di esaki ta bon pa sigui nos páginanan sosial i por bishita nos wèpsait www.adcnv.com