ADC huntu ku GMN ta lansa e kampaña: Kumpra Konsiente- pa un bida salú

VREDENBERG – Analytisch Diagnostisch Centrum (ADC) i Ministerio di Salú, Medio Ambiente i Naturalesa den koperashon ku 4 supermerkado ta lansa e kampaña KUMPRA KONSIENTE – pa un bida salú, den kuadro di Dia Mundial di Diabétis ku ta tuma lugá 14 di novèmber próksimo.

Ku e kampaña KUMPRA KONSIENTE – pa un bida salú, ADC i GMN ke konsientisá pueblo di Kòrsou mas tokante di e malesa di diabétis i su prevenshon, duna mas informashon di ADC su servisio di diabétis i stimulá diabétikonan pa kumpra i kome mas konsiente.

Pa realisá tur esaki durante luna di novèmber tur siman ADC lo para ku e Bus di Salú na un di e supermerkadonan ku ta partisipá, kual ta Mangusa Hypermarket, Carrefour, VD Tweel i Esperamos. Bishitantenan por chèk nan suku kompletamente grátis, risibí informashon di ADC su servisio di diabétis i tambe nan por partisipá na un shopping tour spesialmente pa diabétikonan. Durante e shopping tour aki bou di guia di un dietista partisipantenan lo risibí informashon tokante nutrishon i variashon saludabel pa un diabétiko.

Sifranan ta indiká ku 1 di kada 10 persona na mundu tin diabétis (International Diabetis Federation 2023), 90% di e personanan ku tin diabétis tin e tipo 2. Na Kòrsou 8% di nos poblashon tin e malesa di diabétis (Volksgezondheid Instituut Curaçao 2017). Pues ta sumamente importante pa duna mas informashon pa realisá mas konsientisashon i prevenshon riba e malesa aki.

Pa mas informashon kon pa registrá pa partisipá na e shopping tour di diabétis i pa sa unda e Bùs di Salú ta stashoná por bishita página di Facebook di ADC i GMN.