Komunikado: Dia Internashonal di Hende Muhé den Siensia – ADC ta pone maestranan di Biologia i Kímika den spòtlait

WILLEMSTAD— Awe riba ‘Dia Internashonal di Hende Muhé den Siensia’, Analytisch Diagnostisch Centrum (ADC) ta pone 4 maestra di Biologia i Kímika den spòtlait. Ya kaba pa di tres aña konsekutivo bo laboratorio nashonal ta dediká e dia aki na hende muhénan, tantu hóben i adulto ku tin amor i pashon pa siensia. E aña aki a toka turno na nos maestranan di Kòrsou ku ta duna e materianan Biologia i Kímika; e materianan esensial den e trabou diario di nos laboratorio.

Resientemente e laboratorio a pone un anunsio riba su página di Facebook i Instagram, kaminda tur hende por a laga nòmber atras di nan maestra faborito di Biologia òf Kímika. Di tur e maestranan ku a wòrdu mas tantu menshoná, a skohe un tòp 4.

ADC a bishitá e 4 maestranan na e skolnan. Jùf. Lisett Mauricia di Gouverneur J.R. Lauffer School, jùf. Sonelie Carmela di Dr. Albert Schweitzer College VSBO Parera, jùf. Celyne Maduro di Radulphus College i jùf. Millicent Djaoen di St. Jozef VSBO, pa duna rekonosementu i un pabien kaluroso pa e bon trabou ku nan ta ehersé. Tambe ADC a papia ku alumnonan, pa nan tambe por a kompartí nan testimonio i elogiá nan maestranan di biologia i kímika. Tur esaki por wak riba e página di Facebook i Instagram di ADC.

ADC ta sigui invertí i kontribuí na esnan ku ta aportá na desaroyo di nos hóbennan i ta sigui stimulá hóbennan ku tin ambishon i interes den e mundu di laboratorio. ADC ta duna oportunidat pa e.o. ‘snuffelstage’, guia hóbennan ku nan ‘profielwerkstuk’ riba laboratorio, duna charla na skolnan, rekorido den laboratorio i entrega di BIOSCH Award na e hóbennan ku ta slag ku e mihó sifra pa biologia i kímika.

Nos laboratorio nashonal ta gradisí tur maestra i maestro ku ta ehersé nan trabou diariamente ku amor, pashon i dedikashon. Di kurason danki!

ADC, e laboratorio di Kòrsou mas spesialisá ku ta destaká!