Nos ekspertisionan
Di tur laboratorio lokal, ADC ta ofresé e kantidat mas amplio di análisisnan a base di petishon di médikonan, speshalistanan, hospitalnan i otro laboratorio. Banda di e instansianan médiko, ADC ta e instansia lokal na kabes di servisionan laboratorio pa nos gobièrnu lokal i regional, Ministerio Públiko, kompanianan i individuonan partikular.
Ningun otro laboratorio na Kòrsou no por kompetí ku e gran kantidat i variedat di spesialismo ku ADC ta ofresé. Danki na su ekspertisio amplio ADC por ofresé un kantidat grandi di servisionan analítiko i diagnóstiko di un forma lihé i korekto.
Diagnóstiko Molekular (MD)
E departamentu Diagnóstiko Molekular ta konsentrá riba:
- un detekshon lihé di mikro-organismonan ku por kousa infekshon
- opservá enfermedatnan króniko di infekshon
- konstatá un enfermedat genétiko
E speshalistanan di e departamentu Diagnóstiko Molekular huntu ku dòkternan di kas i speshalistanan médiko ta sòru pa resultadonan rápido i eksakto. E enfoke ta keda riba un bon servisio na tantu e médikonan i e pashèntnan.
Kímika Klíniko i Hematologia (KCH)
E departamentu Kímika Klíniko i Hematologia di ADC ta hasi análisis di sanger i otro líkidonan korporal. E análisisnan aki ta konsentrá riba:
- konstatá òf ekskluí un enfermedat
- sigui e desaroyo di un enfermedat i tambe efekto di tratamentu
- prevení sierto enfermedatnan
Toksikologia i Investigashon di Remedi (TGO)
E departamentu Toksikologia i Investigashon di Remedi di ADC ta investigá efektonan indeseá i dañino di materialnan kímiko den e kurpa humano. E balor sosial di e departamentu aki ta inmenso, teniendo kuenta ku e tipo di análisisnan ku diariamente ta ser ehekutá. Di salubridat di kuminda te ku investigashon forénsiko riba òrdu di Ministerio Públiko: e departamentu TGO ta ehekutá un gran variedat di análisis.
E departamentu TGO ta konsentrá riba:
- Análisis hudisial
- Análisis toksikológiko klíniko i forénsiko
- Análisis di remedi
- Análisis farmaséutiko klíniko
- Análisis di suela
- Kontrol riba balornan nutritivo
- Análisis di produkto
- Análisis di awa
- Análisis di salubridat di kuminda
Mikrobiologia Médiko (MMB)
Den e departamentu Mikrobiologia Médiko tur kos ta konsentrá rondó di infekshonnan. Un infekshon di blas, un infekshon di fungus of un tèst di Zika òf HIV durante embaraso: esaki nan ta algun ehèmpel di enfermedatnan ku por bini di bakteria, fungus i vírùs.
E laboratorio di mikrobiologia médiko di ADC ta hasi análisis riba tur e enfermedatnan aki.
Un dòkter di kas òf speshalista por manda un pashènt laboratorio pa hasi análisis i esaki por tin diferente motibu. Pa un médiko e por ta importante pa sa kua enfermedat ta presente i kua antibiótika ta nesesario, pero tambe pa haña sa si un pashènt tabatin un enfermedat kaba òf si e ta bon bakuná.
Laboratorio di Awa
Riba petishon di Gobièrnu di Kòrsou, ADC ta sòru pa nos awa di bebe ta saludabel. Pa logra esaki ADC ta hasi análisis i kontrol diario den dos laboratorio di awa: un laboratorio di awa físika-kímiko i tambe un laboratorio di awa mikrobiológiko. Klek aki pa lesa mas tokante e Laboratorio di Awa di ADC.
Patologia
Un patólogo ta traha prinsipalmente tras di kortina. Na ADC e speshalistanan aki ta hasi análisis pa enfermedat i iregularidat riba nivel di tehido, sélula i molekular. Ku e resultadonan di e análisis, médikonan por hasi un diagnóstiko mas eksakto. Análisis patológiko ta ser usa riba diferente tereno i e tim spesialisá di ADC ta hasi un variedat enorme di análisis, di investigashon forénsiko te análisis di kanser.