ADC BIOSCH AWARD 2022: Nos laboratorio nashonal ta stimulá hóbennan ku a destaká den biologia i kímika
VREDENBERG – Analytisch Diagnostisch Centrum (ADC N.V.) a organisá pa e di kuater aña konsekutivo e famoso ‘ADC BIOSCH Award’. Pa medio di e BIOSCH Award ta duna atenshon na hóbennan ku a sobresalí den biologia i kímika, materianan ku ta di sumo importansia den e mundu di laboratorio.
Riba 6 di yüli último, alumnonan di èksamen klas di VSBO, HAVO i VWO, ku a slag ku e sifranan mas haltu pa e materianan biologia i kímika a keda invitá na e laboratorio huntu ku nan mayornan i dosentenan di e materia, pa risibí nan ‘ADC BIOSCH Award’. Di e 15 skolnan sekundario ku a partisipá, a saka 6 alumno ku a destaká.
Meta di e inisiativa di ADC BIOSCH Award ta pa duna rekonosementu na hóbennan ku a destaká riba materianan ku ta base pa estudio- i kareranan den e mundu di laboratorio. E sektor aki mester di mas profeshonalnan i spesialistanan pa sirbi nos pais.
Di e forma aki ADC ta invertí pa sigui stimulá hóbennan lokal pa skohe pa e materianan biologia i kímika i sigui desaroyá nan mes riba esaki.
Otro aña ADC BIOSCH Award lo kumpli su promé lustro i ta enkurashá skolnan sekundario pa bolbe partisipá i e hóbennan pa hasi èkstra nan bèst e aña eskolar benidero pa asina nan tambe por tin chèns di bira un nominado i tal bes bira un di e siguiente ganadónan di ADC BIOSCH Award 2023.
A hasi entrega di premio na e siguiente alumnonan:
Radulphus College
Scheikunde VWO – Wilson Hao Yian Rong 9,5
Biologie VWO – Wilson Hao Yian Rong 8,4
MIL
Scheikunde HAVO – Kendrikson Daal 8.5
Kolegio Alejandro Paula
Biologie HAVO – Saphira van der Linden 7.2
Dr. Albert Schweitzer
Biologie HAVO – Chandler Martis 7.2
Marnix College
Scheikunde VSBO – Nico Bonafasia 7.8
Marnix College
Biologie VSBO – Shariviënne Martis 7.5
ADC ta felisitá kada alumno, skol, dosente i mayor ku a aportá na e tremendo logro aki.