Chèk Bo Salú ku ADC N.V.

WILLEMSTAD — Riba djasabra 22 di òktober último, nos laboratorio nashonal ADC N.V., a organisá su konosido ‘Chèk Bo Salú’ na ADC Winston Churchill.

Durante e evento aki tur hende tabata bon biní pa midi nan suku, kolèsteròl i preshon kompletamente grátis na ADC su filial na Churchill Plaza.

Den kuadro di e laboratorio su maneho di prevenshon i konsientisashon pa nos biba mas salú, ADC ta organisá e evento aki regular, pa asina tur hende por tin bista riba nan estado di suku, preshon i kolèsteròl. Banda di esaki ADC tin su revista grátis  ‘Biba Salú’ ku informashon edukativo i tepnan práktiko pa biba un estilo di bida mas saludabel. Tur persona ku a bishitá e evento a risibí nan resultadonan i tambe e revista ‘Biba Salú’.

Tambe ADC a stashoná su ‘Bus di Salú’ riba e plaza pa asina por a akapará e fluho di bishitantenan i tambe pa tur hende sera konosí ku e bùs, ku regularmente ta stashoná den barionan i sitionan komersial di Kòrsou.

Riba e bùs tambe ADC ta brinda e servisio di ‘Chèk Bo Salú’. Tambe si klientenan ta deseá di hasi nan tèstnan di laboratorio manera prek, entrega urina òf shushi, por hasi esaki libremente riba e bùs.

Tabata un mainta bon bishitá, personanan di diferente edat ku tabata deseá di ‘chek nan salú’ a pasa i risibí e bon servisio di ADC manera ta kustumber.

ADC ta sigui sirbi pueblo di Kòrsou ku su ekspertisio i ta keda aktivo den barionan pa tur hende por risibí e oportunidat pa chèk nan salú.

Keda pendiente pa e siguiente fechanan di ‘Chèk Bo Salú: bishitá e página di Facebook di ADC òf wèpsait: www.adcnv.com