ADC BIOSCH AWARD 2023: Pa 5 aña konsekutivo nos laboratorio nashonal ta stimulá hóbennan ku ta destaká den biologia i kímika
VREDENBERG – Analytisch Diagnostisch Centrum (ADC N.V.) ya pa 5 aña konsekutivo ta entrega e famoso ‘ADC BIOSCH Award’ na hóbennan di èksamen klas di VSBO, HAVO i VWO ku a sobresalí den biologia i kímika, materianan ku ta di sumo importansia den e mundu di laboratorio.
Manera e añanan anterior no tabata posibel pa hasi e selebrashon manera kustumbrá, pa e motibu ei ADC a bishita kada skol pa duna e rekonosementu. ADC a bai tur ‘diploma uitreiking’ di esnan ku a slag ku e sifra di mas haltu pa Biologia i Kímika i a entrega e BIOSCH award dilanti tur alumno ku a slag, nan dosentenan i mayornan. Di e 11 skolnan sekundario ku a partisipá, a saka 6 alumno ku a destaká.
Meta di e inisiativa di ADC BIOSCH Award ta pa duna rekonosementu na hóbennan ku a destaká riba materianan ku ta base pa estudio- i kareranan den e mundu di laboratorio. E sektor aki mester di mas profeshonalnan i spesialistanan pa sirbi nos pais.
Di e forma aki ADC ta invertí pa sigui stimulá hóbennan lokal pa skohe pa e materianan biologia i kímika i sigui desaroyá nan mes riba esaki.
ADC BIOSCH Award tei pa keda hopi aña mas i ta enkurashá skolnan sekundario pa sigui partisipá i e hóbennan pa sigui hasi èkstra nan bèst e aña eskolar benidero pa asina nan tambe por tin chèns di bira un nominado i tal bes bira un di e siguiente ganadónan di ADC BIOSCH Award 2024.
A hasi entrega di premio na e siguiente alumnonan:
Radulphus College
HAVO Scheikunde; Nick Maurera cijfer 8.5
VWO Biologie; Sofia Nolles cijfer 8.6
VWO Scheikunde; Ajay Raghani – 9.4
KAP Kolegio Alegandro Paula
HAVO Biologie; Touka Mawas cijfer 7.5
St. Paulus College VSBO TKL
Biologie; Shardyona Nicolina cijfer 7.7
Marnix College VSBO TKL
Scheikunde; Jovangca Plesimond cijfer 8.5
ADC ta felisitá kada alumno, skol, dosente i mayor ku a aportá na e tremendo logro aki.
Riba potrèt por mira e entrega di e BIOSCH award na e ganadónan huntu ku un representante di ADC.
