ADC ta risibí pèrmit di konstrukshon pa edifisio nobo den Otrobanda

WILLEMSTAD- Riba djaluna 5 di yüli Analytisch Diagnostisch Centrum (ADC) nos laboratorio nashonal a risibí su pèrmit pa konstruí e edifisio nobo di ADC na Otrobanda, for di Minister di Tráfiko, Transporte, i Planifikashon Urbano; sr. Charles Cooper. Entrega di e pèrmit di konstrukshon a tuma lugá na ROP, kaminda direktor di ADC, sra. Liane Virginia-Cova a risibí esaki di forma ofisial.

Ku e pèrmit aki ADC por kuminsá ku e konstrukshon di e edifisio nobo mas pronto ku ta posibel. E proyekto aki tin un invershon di alrededor 20 mion florin i tin un durashon di konstrukshon di aproksimadamente 1,5 pa 2 aña. E edifisio nobo ta keda konstruí dor di kontratistanan lokal i lo bira un ‘State of the Art Laboratory’ kaminda tur disiplina di e laboratorio médiko lo ta bou di un dak. Un laboratorio moderno kompañá ku teknologia avansá ku sigur tin benefisionan lokal i Internashonal.

Aktualmente ADC tin 13 prekpòst repartí rònt Kòrsou ku su laboratorionan situá na Vredenberg i Roodeweg. Despues di mas ku 60 aña lo bandoná e sitio di Vredenberg pa bai pa un edifisio nobo. Pues esaki ta un komienso di un kapítulo nobo; un transishon ku lo marka historia.

Konstrukshon di e edifisio nobo lo pone ku e disiplinanan di análisis ku ta wòrdu ehersé den laboratorio Vredenberg i Roodeweg, lo ta huntu den un edifisio na Otrobanda. Esaki ta hasi e trabou muchu mas efisiente pa asina por sirbi komunidat i henter e sektor di kuido aun mas mihó.

E edifisio nobo lo wòrdu konstruí riba e tereno kaminda e magazijn di SEHOS tabata situá ku ta enfrente di Curaçao Medical Center (CMC). For di Novèmber 2019, ADC ta fungi komo e laboratorio di nos hospital. Diferente disiplina ku tabata situá na ADC Vredenberg ya a muda bai ADC Roodeweg pa asina por sirbi CMC 24/7. Pa por a brinda un servisio tur afó na un ‘State of the Art hospital’ ADC a modernisá diferente ekipo usando diferente teknologianan ultra moderno. Entre otro e asina yamá ‘buizenpost’ ku pa medio di un tubu, muestranan di sanger, urina etc. for di CMC ta yega e laboratorio di Roodeweg den ménos ku 30 sekònde. Modernisashon i teknologianan avansá lo no falta den e edifisio nobo, tur esaki pa elevá nos sektor di salubridat aun mas.

ADC ta sumamente kontentu ku den presensia di Minister sr. Charles Cooper e promé paso pa konstrukshon a keda kristalisá pa den futuro serkano por sirbi pueblo for di e kurason médiko di Otrobanda!

VREDENBERG 5 DI YULI 2021