ADC ta pidi indulgensia na klientenan pa tèst Covid-19

WILLEMSTAD— Meskos ku hopi kompania mundialmente i na Kòrsou, ADC N.V. tambe ta eksperensiá e efektonan di e pandemia di Covid-19 den e último dianan.

Den e situashon ku tin awor aki, hopi trahadó di ADC ta malu na kas òf pa motibu di tabata den kontakto ku hende kontagiá (‘close contact’) ta den karentena. Den práktika esaki ta nifiká ku tur dia tin ku schuif pa asina por habri tur lokalidat pa sirbi tur kliente.

Alabes pa motibu di e kantidat di kontagio ku ta subiendo, hopi hende ku síntoma ta akudí na dòkter di kas/GGZ pa despues nan bin hasi un tèst. Tin tambe un kantidat di persona ku ta bin hasi tèst pa motibu ku nan tabata den kontakto ku un persona ku a tèst positivo. Ta bin aserka ku e kantidat di turista ku ta bishitando nos isla tin ku hasi e tèst antígeno na momentu ku nan tin tres dia na Kòrsou. Tur esakinan por kontribuí na reinanan largu na lokalidatnan di tèst Covid-19.

Pa e servisio na e diferente lokalidat kana mas rápido, ADC kier pidi tur hende registrá via www.covid19pcrtestcuracao.com. Di e forma aki e tempu di espera ta bira muchu mas kòrtiku. Aktualmente hopi hende no ta hasi esaki I esei ta pone ku bo tin un grupo di hende ku a registrá i un otro grupo ku ta yega pa tèst sin registrá. Ta bon pa indiká ku klientenan ku no registrá ta tene man komo ku mester yena tur informashon na e momentu ku nan yega.

Pa loke ta trata nos sentro di servisio na Palu Blanku, personanan ku ta bin via dòkter di kas/GGZ tin ku hasi uso di e ‘drive thru’. Ta dirigí tur vehíkulo pa e área aki. Personanan ku ta bin hasi tèst pa bai di biahe/òf pa motibu personal i e tèst antígeno riba nan di 3 dia por hasi e tèst aki parti paden di e lokalidat. Komo fasilidat èkstra parti atardi entre 4’or i 7’or tin oportunidat pa kliente ku no por registrá “walk in”, pues drenta sin sita i hasi un tèst.

Na e sentronan di servisio di ADC na Lions Dive, Papagayo i Aeropuerto klientenan ku a registrá so por akudí. Si no tin espasio disponibel pa traha sita, e kliente por skohe un otro lokalidat di ADC.

ADC ta pidi klientenan pasenshi  i alabes komprenshon pa e situashon. Nos trahadónan ta hasiendo nan máksimo esfuerso pa sigui brinda e servisio.

Pa mas informashon tokante orarionan i lokalidatnan pa tèst Covid-19 por bishitá nan wèpsait òf página di Facebook.