ADC N.V. ta pasa ouditoria un bes mas. Nos laboratorio nashonal ku akreditashon internashonal
Willemstad – Resientemente ADC a pasa ouditoria anual di Raad voor Accreditatie (RvA) ku éksito. Ku apenas algun punto mínimo di mehorashon, e laboratorio ta sumamente orguyoso di e resultado positivo aki. Spesialmente konsiderando ku nunka anterior a traha ku e norma nobo aki.
E aña aki e ouditoria a keda realisá a base di e norma internashonal aktualisá ISO 15189:2022.
E akreditashon di RvA ta un marka di kalidat, rekonosé riba nivel internashonal, ku ta indiká ku ADC ta traha segun eksigensianan haltu i estrikto. Pa pashènt i dunadónan di kuido, esaki ta nifiká ku resultado di tèstnan ta konfiabel, sigur i di kalidat haltu.
Diferente area di spesialismo
ADC ta distinguí su mes komo un laboratorio multidisiplinario. Ku esaki e laboratorio por duna un gama ekstenso di servisionan analítiko i diagnóstiko. E laboratorio ta konsistí di 4 área di spesialismo médiko: Kímika Klíniko i Hematologia (KCH), Toksikologia i Investigashon di Remedi (TGO), Mikrobiologia Médiko (MM) i Patologia.
Ku ekspertisio amplio aki ADC ta brinda posibilidat pa kondusí mayoria tèst lokalmente, sin mester manda muestranan pa eksterior. Esaki ta garantisá resultado mas lihé i adishonalmente ta sostené direktamente kuido i salubridat riba nos isla.
Manehá riesgo, garantisá kalidat
E vershon nobo di e norma ISO ta rekerí pa laboratorionan traha mas a base di maneho di riesgo. I durante e ouditoria, ADC a demostrá di forma profeshonal i transparente ku riesgonan ta wòrdu identifiká trempan, evaluá i mitigá.
E konklushon eksitoso di e ouditoria ta resultado di un esfuerso den ekipo. Empleadonan di kada departamento a traha huntu pa demonstrá e kalidat garantisá di e laboratorio.
Danki na e tim kompletu di ADC, ku diariamente ta traha dediká i ku pashon, ku nos laboratorio nashonal, ta mantené su akreditashon i un bes mas ta konfirmá su ròl komo lider nashonal i regional.
Mas informashon? Bishitá www.adcnv.com, retnan sosial òf yama 434-5100.