ADC konektá riba ret internashonal pa vigilá i detektá posibel variante i vírusnan nobo

WILLEMSTAD— Analytisch Diagnostisch Centrum (ADC), nos laboratorio nashonal, lo ta konektá riba e ret internashonal pa vigilá i eventualmente detektá variantenan di vírus ku ta sirkulá. Ta trata di e vírus SARS-CoV-2 ku a okashoná e último pandemia. Banda di esei lo vigilá tambe vírusnan nobo.

Despues ku e pandemia a baha na intensidat, e preokupashon den mundu médiko i sientífiko si no a bai. Den mundu médiko i sientífiko ta eksigiendo mas i mas pa mundu keda den estado di alerta. Den e kuadro aki a traha riba plannan pa sigui vigilá di serka variantenan i tambe otro posibel vírusnan nobo pa asina por aktua na tempu si esei ta nesesario.

Den e kuadro aki Komishon Oropeo a lanta e loke a haña e nòmber Health Emergency Preparedness and Response Authority (HERA) Incubator. E palabra Incubator ta referí na status di e outoridat ku ainda ta den fase di preparashon. Komishon Oropeo a duna un supsidio na Ulanda pa traha riba un sistema di vigilansia kual supsidio lo benefisiá tambe Caribe Ulandes.

E koordinador pa Ulanda di e plan ta Rijksinstituut voor Volksgezondheid en Milieu (RIVM) ku ta resortá bou di e Ministerio di Salubridat, Bienestar i Deporte di Ulanda. RIVM a skohe ADC di Kòrsou i LABHOH di Aruba komo e dos laboratorionan den Karibe pa ta parti di e proyekto inovativo aki.

For di yüni aña pasá, dos funshonario di ADC a biaha pa Ulanda kaminda nan a risibí e trainingnan nesesario pa e proyekto. Den e kuadro aki ADC a risibí un aparato sofistiká ku ta hasi posibel pa vigilá i detektá posibel variante i vírusnan nobo, konosí den mundu sientífiko komo “sequencing”.

Siman pasá dos eksperto di RIVM a bin Kòrsou pa duna training i guia na e departamento di Mikrobiologia Médiko di ADC pa loke ta trata uso di e aparato aki. E eskoho pa ADC ta konfirmá nos laboratorio nashonal komo e entidat máksimo riba e tereno aki i un rekonosementu pa e trabou di nos ekspertonan ku ta traha na ADC.

Banda di esei ta bon pa menshoná ku e proseso aki no ta importante pa alsa vigilansia den reino ulandes so pero tambe ta un kontribushon pa alsa kalidat di nos salubridat públiko lokal. Ku e
desaroyo aki, Kòrsou lo ta prepará pa kualke eventualidat tantu lokalmente komo den konteksto internashonal.