ADC BIOSCH Award pa alumnonan ku ta destaká den biologia i kímika

ADC BIOSCH Award
pa alumnonan ku ta destaká den biologia i kímika

Willemstad – Analytisch Diagnostisch Centrum (ADC N.V.) pa di dos aña ta bai duna rekonosementu na kandidatonan den klas di eksámen di enseñansa sekundario ku a destaká den e vaknan biologia i kímika.
Aña pasá tabata e promé aña ku ADC a kuminsá ku e inisiativa aki pa promové atenshon i interes pa e dos materianan sientífiko akí, ku e BIOSCH Award. Gustosamente Kòrsou su laboratorio nashonal ku su atenshon pa formashon, ta rekonosé i stimulá talento lokal riba tereno di biologia i kímika.

A pesar ku e aña eskolar aki a kana diferente for di ‘normal’ ADC ta kere ta importante pa sigui rekompensá nos hóbennan pa nan tremendo dedikashon i perseveransia durante e aña eskolar.
Alumnonan di VSBO (T.K.L.), Havo i VWO ku sifra final di mas haltu pa biologia i kímika por keda nominá dor di e skolnan pa bini na remarke pa nominashon.

Fin di yüni lo hasi entrega di e award según reglanan di e ‘normal nobo’. Pa mas informashon por manda e-mail pa unitcommunicatie@adcnv.com