ADC A PONE OTRO PIEDRA PA UN FUTURO MAS BRIANTE

WILLEMSTAD— Djabièrnè último Analytisch Diagnostisch Centrum ku den boka di pueblo ta konosí komo ADC, a pone un piedra mas pa un futuro briante. No solamente pa sektor di kuido médiko i laboratorio pero pa futuro di Kòrsou. “Nos a dal un paso importante ku bista riba presente i futuro. Nos lo sigui destaká”, asina direktor di ADC Liane Cova a bisa na e seremonia.

E seremonia a konta ku presensia di diferente invitado, entre nan diferente minister i representante di pueblo.

Sra. Cova a bisa ku ADC ta é laboratorio médiko ku ta marka pouta na Kòrsou i den region. “Nos ta dilanti den e posibilidatnan analítiko i diagnóstiko ku ta kumpli ku e normanan di mas haltu i mas estrikto den e mundu di análisis médiko. Niun otro laboratorio na Kòrsou ta ofresé un skala di spesialismo asina amplio manera ADC”, asina e direktor di ADC a indiká.

E gerente a splika mas aleu ku ADC ta hasi tèst pa sernan humano, riba animal i material no-humano. ADC ta un Laboratorio Akreditá pa RVA na Hulanda. For di aña 2009 ADC ta akreditá pa Awa ku ISO 17025 i for aña 2016 komo Laboratorio Médiko, ISO 15189.

“Nos ta brinda e skala mas amplio di investigashon, hasí riba petishon di dòkternan di kas, spesialista, hòspital i klínikanan i tambe pa otro laboratorionan. Banda di institutonan médiko ADC ta e instansia prinsipal pa servisionan di laboratorio, pa gobièrnu lokal, Ministerio Públiko, otro gobièrnunan den Karibe hulandes i tambe empresanan i klientenan ‘partikular’. Ku esaki ADC tur dia di nobo ta ofresé un gama ekstenso di servisio analítiko i diagnóstiko eksakto, konfiabel i rápido”.

Sra. Cova a menshoná tambe e ròl instrumental ku ADC a hunga den e pandemia ku servisio di ekselensia di manera ku Kòrsou por a lanta bèk riba pia relativamente lihé. Den e kuadro aki, sra. Cova a yama danki na tur kolega i kliente ku a hasi uso di e servisio di ADC.

Finalmente sra. Cova a bisa ku no ta djis konstrukshon di un edifisio bunita di blòki ku semènt a inisiá. “Awe ta un dia históriko i memorabel i e ta parti integral di un desaroyo. E ta parti di é futuro ku ADC a fiha. E diseño i funshonalidat a tene kuenta pa krea un sentro di aktividat di Laboratorio moderno, ku definitivamente lo kontribuí na e ambiente indispensabel pa ADC por sigui destaká di forma konsistente pa próksimo dékadanan. Konstrukshon di e edifisio nobo di ADC na e lokalidat aki lo duna na su manera un impulso pa asina sigui desaroyá e área di Colon i Otrobanda den un sentro di servisio di salubridat pa nos pueblo. Esei lo mester kontribuí tambe na mas efisiensia i un servisio agradabel i segun normanan mas moderno”, asina e direktor a bisa finalmente.

INFORMASHON ADISHONAL

E konstrukshon di e edifisio nobo lo dura 24 luna. Ta trata di un edifisio di tres piso ku lo akapará tur aktividat di ADC riba un tereno di 5.500 meter kuadrá. E edifisio nobo lo enserá ku ADC lo bandoná su edifisio na Vredenberg ku ta trahá for di 1960.

Dia 5 di yüni último e Ministerio di Infrastruktura a duna e pèrmitnan nesesario. E edifisio ta diseñá pa e arkitekto di Kòrsou, Lyongo Architects di OZ Architects.

Kontratistanan lokal lo ehekutá e proyekto ku Q-Con Quality Constructors komo kontratista prinsipal huntu ku Installation Technologies, SimpleAire i Industech.

E proyekto ta finansiá pa Vidanova Pension Fund.