ADC BIOSCH AWARD 2024: Nos laboratorio nashonal ta premia hóbennan ku ta destaká den biologia i kímika
VREDENBERG – Pa di seis aña konsekutivo ADC N.V. a organisá su ADC BIOSCH Awards, kaminda ta premia e alumnonan di èksamen klas di VSBO, HAVO i VWO, ku a slag ku e sifranan mas haltu pa e vaknan Biologia i Kímika, materianan ku ta base pa estudio- i kareranan den e mundu di laboratorio.
Riba 3 di yüli último, alumnonan di èksamen klas di VSBO, HAVO i VWO, ku a sobresalí den Biologia i Kímika a keda invitá na e laboratorio huntu ku nan mayornan i dosentenan di e materia, pa risibí nan ‘ADC BIOSCH Award’. Di e 9 skolnan sekundario ku a partisipá, a saka 7 alumno ku a destaká; ku empate entre dos studiante.
Pa medio di entrega di e ADC BIOSCH Award, nos laboratorio nashonal ta rekonosé i stimulá nos hóbennan ku a destaká den Biologia i Kímika, ku ta materianan klave i di gran balor pa e mundu di laboratorio. ADC ta enkurashá hóbennan pa sigui desaroyá i amplia nan konosementu riba e terenonan aki, pa asina nan tambe por kontribuí na nos pais of riba nivelnan internashonal.
E aña aki ADC a aserká diferente kompania ku e traha kune riba un base regular, pa nan tambe por premia e alumnonan pa nan tremendo resultado. ADC ta gradisí Ralfmed International B.V.. Karakol N.V. i Boolchand’s pa nan kontribushon.
Di e forma aki huntu ta invertí den hóbennan lokal pa sigui stimulá nan pa skohe pa e materianan aki.
Nos ta keda pendiente pa e siguiente BIOSCH award ku lo ta e di shete edishon. ADC ta rekordá tur skol sekundario pa partisipá. Tambe ta enkurashá alumnonan di èksamen klas di VSBO, HAVO i VWO pa nan duna tur di nan banda e aña eskolar benidero pa nan tambe por kai den premio di ADC BIOSCH Award 2025.
A hasi entrega di premio na e siguiente alumnonan:
Skol Avansa Amador Nita
Biologie VSBO – Wilchanie Exius – 7.8
Marnix College
Scheikunde VSBO – Joey Jimenez – 7.7
MIL
Biologie HAVO – Helios Tobit de Jongh – 7.7
Radulphus College
Scheikunde HAVO – Matthew Justin Cloose – 8.6
Scheikunde HAVO – Xayvion Ferdinand Arnold Petronia – 8.6
Albert Schweitzer
Biologie VWO – Amber E. de Vries – 8.2
KAP
Scheikunde VWO – Aimée Waller Diemont – 8.4
ADC ta felisitá kada alumno, skol, dosente i mayor ku a aportá na e tremendo logro aki.