Patologia

Patologia

E palabra patologia ta bini di dos palabra Griego ku ta pathos (=enfermedat) i logo (=estudio, kual ta nifiká estudio di enfermedat).

Patologia komo spesialísmo médiko ta enserá investigashon di tehido i sélula pa iregularidatnan.

Den e laboratorio di patologia di ADC tehidonan (histologia), líkido i “uitstrijken” (cytologia) ta wòrdu analisá ku yudansa di un mikroskop. Analistanan spesialisá ta sòru pa e materia wòrdu prepará i prosesá di e manera korekto. Konsekuentemente un patólogo ta hasi un diagnóstiko i esaki ta bai bèk pa e dòkter di kas òf speshalista. Awendia, un otro ròl importante di patólogonan, banda di konstatá e orígen i estado di e enfermedat, ta e MDO (Multidisciplinair Overleg) kual ta un konsulta multi-disiplinario kaminda tur speshalista konserní ta trata kaso di e pashènt i por kontribuí na e plan di tratamentu di pashèntnan.

Konstantemente e departamentu di Patologia ta traha pa yega na diagnóstikonan mas lihé i eksakto. Analisá e posibilidat pa un tratamentu eksitoso ta un sumamente importante. Esaki ta tuma lugá ku téknikanan manera “immunhistochemie” i diagnóstiko molekular. E departamento di Patalogia di ADC ta ehekutá diferente análisis “immunohistochemisch”, pero pa algun análisis ta manda e materia por ehèmpel Hulanda. Pa sierto malesa straño tambe ta pidi konsulta den eksterior.

Un otro aspekto importante ta investigashon sitológiko, entre otro paptèst. Ku esaki, individualmente òf huntu ku konstatá HPV molekular, por yega na un evaluashon riba presensia di kanser na boka di matris (den fase inisial). Aki na Kòrsou, na ADC ta e úniko laboratorio ku tin tur dos téknika disponibel.

Solamente un parti chikitu di e trabou den patologia ta enfoká riba outopsia. Esaki ta nifiká investigashon riba e kousa di morto serka personanan ku a fayesé. E departamentu Patologia di ADC tin un patólogo forénsiko, ku ta ehersé su trabou na Kòrsou i tambe otro islanan den region. Pa un patólogo forénsiko sí outopsia ta forma un gran parti di su trabou. Banda di esaki e ta ehersé tareanan riba tereno di medisina forénsiko pa polis i hustisia.