Toksikologia i Análisis di Remedi (TGO)
E departamentu Toksikologia i Análisis di Remedi (TGO) di ADC ta investigá efektonan indeseá i dañino di materialnan kímiko den e kurpa humano. E balor sosial di e departamentu aki ta inmenso, teniendo kuenta ku e tipo di análisisnan ku diariamente ta ser ehekutá. Di salubridat di kuminda te ku investigashon forénsiko riba òrdu di Ministerio Públiko: e departamentu TGO ta ehekutá un gran variedat di análisis.
E laboratorionan Médiko ta akreditá dor di RvA for di yüni 2016 pa EN-ISO 15189 bou di e aktividat ‘TESTEN’ ku e number di registrashon M297.
Pa un lista di e tèstnan akreditá por akudí na e scope di akreditashon di ADC NV riba https://www.rva.nl.
Análisis hudisial ta un di e tareanan prinsipal di e departamentu di TGO. Riba òrdu di polis, duana i/òf Ministerio Públiko ta ehekutá análisis riba medionan ku ta den e Opiumlandsverordening 1960: en partikular droga.
E departamentu TGO ta hasi:
- Análisis hudisial
- Análisis toksikológiko klíniko i forénsiko
- Análisis di remedi
- Análisis farmaséutiko klíniko
- Análisis di produkto
- Análisis di awa
- Análisis di suela
- Análisis di salubridat di kuminda
- Kontrol riba balornan indiká den tabèl di nutrishon
Análisis Hudisial
Análisis hudisial ta un di e tareanan prinsipal di e departamentu di TGO. Riba òrdu di polis, duana i/òf Ministerio Públiko ta ehekutá análisis riba medionan ku ta den e Opiumlandsverordening 1960: en partikular droga.
Análisis Toksikológiko Klíniko i Forénsiko
- E tipo di análisis aki mayoria biaha ta deseabel ora ku un pashènt ingerí un supstansia deskonosí òf un kantidat demasiado altu di un supstansia konosí – aksidentalmente òf intenshonalmente. E tipo di análisis aki ta nesesario na momento ku, pa e tratamentu, ta importante sa kua i ki kantidat di e supstansia ta presente den sanger òf orina.
- Análisis di toksikologia klíniko por kubri henter e totalidat di remedi i droga disponibel manera entre otro: kokaina, amfetamina (XTC), opio, paracetamol, salicylzuur, alkohòl i GHB (tambe konosí komo “date rape drug”). E análisis ta identifiká i kuantifiká e medionan aki eksaktamente.
Análisis Toksikológiko Forénsiko
Esaki ta análisis toksikológiko pa un kaso hudisial. Mayoria biaha mester identifiká te ki grado supstansianan potensialmente dañino a kontribuí na manehá bou di influensia i aksidentenan den tráfiko, morto no-natural òf intoksikashon. E análisis ta hasi uso di material korporal: den tur kaso sanger i/òf orina. Asina por evaluá si e supstansianan kualitativo den e konsentrashon kuantitativo por aklará e síntomanan opservá òf fayesimentu di e víktima.
Di remedi te ku food safety
Análisis di remedi ta konsentrá riba kontrol di kalidat farmaséutiko di remedinan nobo ku ta ser presentá na e Komishon di Registro di Remedi di Kòrsou. Análisis analítiko di remedi ta krusial pa aprobashon di e registrashon di un remedi nobo. Remedinan prepará lokalmente den botika i tambe produktonan farmaséutiko mester wòrdu presentá pa análisis.
Análisis Farmaséutiko Klíniko
E análisis akí ta determiná e konsentrashon terapéutiko di un remedi den e materia korporal (mayoria biaha den sanger). E meta ta pa optimalisá e funshon di e remedi, tambe yamá na hulandes Therapeutische Drug Monitoring (TDM). Esaki ta sosodé entre otro ku tratamentu di epilepsia, depreshon mániko òf reakshonnan di rechaso ora di transplante.
Análisis di Produkto
Ta hasi e Análisis aki riba petishon di produktornan lokal òf internashonal. Ta trata di tèstnan kualitativo i kuantitativo di sierto supstansianan, manera entre otro methanol, aceton, bitrex i tertiair butylalcohol. Pa esaki por skohe diferente método i téknikanan. Tambe ta midi e nivel di ethanol den bibidanan alkohóliko.
Análisis di Awa
Kontinuamente ADC ta kontrolá e siguridat di nos awa pa konsumo aki na Kòrsou, tur dia di aña. E departamentu TGO ta hasi e parti físika-kímiko di e kontrol.
E laboratorionan di awa ta akreditá dor di e Raad voor Accreditatie (RvA) for di 25 di mart 2009 pa EN-ISO/IEC 17025 ku e number di registrashon L493, pa e akshonnan deskribí den e scope: https://www.rva.nl.
Banda di esaki e departamentu TGO – riba petishon – ta analisá tambe awa ku otro propósito manera entre otro awa di pisina i awa di pos.
Análisis di Suela
Pa e tipo di análisis aki ta analisá un muestra di suela riba diferente aspekto. Por trata di un análisis físika-kímiko òf un análisis di metal por ehèmpel.
Kontrol riba balornan indiká den tabèl di nutrishon
E tabèl di nutrishon ta indiká e promedio di balornan nutritivo di un produkto. Ta yega na e promedionan aki a base di tabèlnan independiente lokal i internashonal. E departamentu di TGO por hasi análisis tambe riba komposishon di supstansianan nutritivo.
