ADC ‘Diabetis Tour’ Un gran éksito den barionan
WILLEMSTAD — Riba djadumingu 21 di novèmber último, nos laboratorio nashonal a organisá un ‘Diabetis Tour’, kaminda e Bùs di Salú a bishitá diferente bario pa duna oportunidat na tur hende bin midi nan suku grátis.
E ‘tour’ aki ta en konekshon ku e Dia Internashonal di Diabétis riba 14 di novèmber. Den kuadro di e programa edukativo i preventivo di ADC relashoná ku e tema diabétis, a organisá un ‘tour’ kaminda e bùs a bishitá misa di Janwé, Barber i Plenchi Shon Tin na Boca Sami.
Na tur tres lokalidat e bùs a keda bon bishitá. Personanan di diferente edat a bini spesial pa kontrolá nan suku, hasi pregunta i risibí informashon.
Pa ADC ta un honor pa kontribuí na prevenshon i salubridat di nos komunidat. ADC su Bùs di Salú lo sigui kore den barionan pa asina duna oportunidat na un i tur pa kontrolá nan salú.