Mikrobiologia Médiko (MMB)
Den e departamentu di Mikrobiologia Médiko tur kos ta konsentrá rondó di infekshonnan. Un infekshon di blas, un infekshon di fungus of un tèst di Zika òf HIV durante embaraso: esakinan ta algun ehèmpel di enfermedatnan ku por bini di bakteria, fungus i vírùs.
E laboratorio di Mikrobiologia Médiko di ADC ta hasi investigashon riba tur e enfermedatnan aki.
Un dòkter di kas òf speshalista por manda un pashènt laboratorio pa hasi análisis i esaki por tin diferente motibu. Pa un médiko e por ta importante pa sa kua enfermedat ta presente i kua antibiótika ta nesesario, pero tambe pa haña sa si un pashènt tabatin un enfermedat kaba òf si e ta bon bakuná.
Kalidat i konfiabilidat ta e guianan prinsipal. E departamentu ta enfoká riba kuido di e pashènt individual pero tambe riba salubridat públiko di nos komunidat aki na Kòrsou i den region. Adishonalmente ta analisá materialnan di dòkter di bestia.
E tereno di análisis di MMB na ADC tin un spesialismo amplio i ta konsentrá entre otro riba:
- Diagnóstiko
- Konsulta i Konseho
- Investigashon pa hospitalnan
- Salubridat públiko
E laboratorionan Médiko ta akreditá dor di RvA for di yüni 2016 pa EN-ISO 15189 bou di e aktividat ‘TESTEN’ ku e number di registrashon M297.
Pa un lista di e tèstnan akreditá por akudí na e scope di akreditashon di ADC NV riba https://www.rva.nl.
Departamentu di Spesialismo amplio
Diagnóstiko
Ehekushon di análisis mikrobiológiko molekular pa instansianan den e sektor di salubridat, dòkternan di kas i speshalistanan médiko na bienestar di e kuido di pashènt den Reino Hulandes. E análisis ta inkluí detekshon di mikro-organismonan òf e reakshon di e kurpa riba esaki nan.
Konsulta (inter-kolegial)
Koleganan médiko por risibí konsulta di nos médiko mikrobiólogo na ADC – tantu pa e pashènt individual komo e aspekto general riba diagnóstiko i terapia anti-mikrobio. E médiko mikrobiólogo ta duna konseho ku òf sin un petishon riba diagnóstiko, tratamentu i prevenshon di infekshon. Tambe ta duna konseho na benefisio di e maneho general Antibiótiko i Kimoterapia.
Hospitalnan
E departamentu di MMB ta hasi investigashon pa (por) konstatá i prevení infekshonnan den hospital. Banda di esaki tambe ta duna konseho riba tereno di higiene pa por prevení infekshonnan.
Salubridat Públiko
E departamentu di MMB ta sostené e vigilansia di nos salubridat públiko trahando huntu ku diferente instansia. E partnernan den kuido aki ta: e Uitvoeringsorganisatie Geneeskunde en Gezondheidszaken (Uo G&Gz, ántes GGD), e departamentu di Higiene di Curaçao Medical Center i tambe komishonnan di prevenshon di infekshon di diferente instasha médiko.
Ora ta nesesario, e departamentu di MMB ta partisipá tambe na investigashon di epidemiologia.
