Historia

For di e ‘Laboratorium van de Openbare Gezondheidsdienst’ ku a habri na òktober 1916, a bini e ‘Landslaboratorium voor de Volksgezondheid op Curaçao’.

Inisialmente e investigashonnan hasí tabata di índole bakteriológiko, serológiko i histológiko. No muchu despues un departamentu kímiko a bini aserka pa kùrmentu di kuminda, análisis di muestra di awa i investigashon di merkansia.

E laboratorio tabata duna e Servisio di Salubridat un bista riba kon malesanan di infekshon tabata plama riba e isla. Tambe e tabata hasi investigashonnan rutinario pa e pashèntnan den Sint Elisabeth Hospitaal (Sehos, ku pa hopi aña tabata e hospital nashonal di Kòrsou). Tambe tabata hasi investigashonnan bou di bestia di krio pa

asistensia diagnóstiko i terapeutiko.

E aktividatnan a mengua hopi despues ku e inisiadó, dr. N. Waterman, a bai for di e isla na 1922. Ta te ora a bini ku un patólogo-anatomista na 1935 i un bakteriólogo-serólogo na 1939, e trabounan a lanta atrobe – anto na nivel di e eksigensianan ku tabata vigente e tempu ei.

E ramo di kímika klíniko a bira popular den añanan 50 di e siglo pasá i ora Sehos a empleá un kímiko klíniko, un parti konsiderabel di investigashonnan diagnóstiko den e spesialismo akí a bin ta tuma lugá na Sehos.

E laboratorionan ku tabatin promé ku ADC, tabata situá primeramente den e ‘Quarantainegebouw’ na Miundu Nobo, despues den Fort Amsterdam na Punda i, for di 1941, den e edifisio enfrente di e museo nashonal aktual na Otrobanda.

Komo ku na dado momento e edifisio último akí no tabata kumpli ku ni e eksigensianan di mas elemental di e profeshon, a disidí alrededor di 1960 pa konstruí un edifisio nobo. A skohe Vredenberg komo sitio, entre otro pasobra tabatin plan pa konstruí un hospital i un poliklínika nobo ei. Lo a duna e laboratorio un ‘prik-poli’ (manera un prekpòst awendia) pa kolekshon di material pa tèst. Tambe lo a krea e posibilidat pa hasi análisisnan hematológiko.

A hospedá e departamentu di Inspekshon di Salubridat di e tempu ei tambe den e edifisio prinsipal.

E ‘Landsinstituut voor de Volksgezondheid’ a bira operashonal na 1964. Semper e edifisio na Heelsumstraat tabata esun prinsipal di e laboratorio.

A independisá e laboratorio na aña 2000 i a dun’é e nòmber Analytisch Diagnostisch Centrum N.V. (abreviá na ADC). E komienso komo un kompania di gobièrnu independiente no tabata optimal, pero despues di e eksperensia inisial ei e organisashon a progresá i a sigui bira mas i mas efisiente i efektivo.